GJP i tekem posisen blong Presiden blong Shefa Provins

Long moning blong namba 2 March 2015, ol kaonsela blong Shefa Provins oli elektem wan niufala Presiden mo kabinet blong Shefa Provinsel Gavman.

Ol sem politikol pati we oli bin putum Presiden mo gavman blong Shefa afta long las provinsel eleksen long 2013, oli joen tugeta bakagen blong putum niufala gavman blong kasem nekis provinsel eleksen long 2017.

Ol pati ia i gat Green Confederation (GC), Vanuatu National Development Party (VNDP), Iauko Group (IG), Graon mo Jastis Pati (GJP) mo Vanuaaku Pati (VP).

Blong luksave sapot we wan-wan political pati i givim long niufala gavman blong Shefa Provins, ol pati i agri blong sherem ol posisen long kabinet olsem:

(a) GJP (Kaonsela Max Johnny) i karem posisen blong Presiden blong Provins;
(b) GC (Kaonsela Bape Vatoko) i karem posisen blong 1st Vaes-Presiden blong Provins;
(c) VNDP (Kaonsela Edward George, outgoing Presiden) i karem posisen blong 2nd Vaes-Presiden blong Provins;
(d) VP (Kaonsela Bob Homu) i karem posisen blong 3rd Vaes-Presiden blong Provins.

Eleksen blong Kaonsela Max Johnny olsem President blong Shefa Provins hemi makem wan histri olsem fes taem we wan kaonsela blong East Efate hemi kam Presiden blong Provins.  Mo tu hemi nambatu taem nomo we wan kaonsela blong northern part blong Efate hemi kam Presiden blong Provins.


Foto: Niufala kabinet blong Shefa Provinsel Gavman (left to right: Bob Homu (VP, 3rd Vice-President), Bape Vatoko (GC, 1st Vice-President), Max Johnny (GJP, President, outgoing 1st Vice-President), Edward George (VNDP, 2nd Vice-President, outgoing President)