Lonjing blong MP Alokesen Spending Ripot blong 2015 blong Hon. Alfred Maoh – Santo Rurol

March 12 2015 hemi bin wan historikel taem blong pipol blong Vimele Vilej long Saot Santo Eria 2 blong oli save witnisem ofisol lonjing blong MP Allocation Posta Ripot blong MP Maoh blong yia 2014.

Long toktok blong MP Maoh hemi talem se wan olgeta stampa tingting blong Graon mo Jastis Pati (GJP) hemi blong soemaot mo promotem wan niufala kaen fasen blong save mekem gudfala lidasip olsem wan MP mo wan nasonal lida, mo tastawe olsem wan Memba blong Palamen blong Santo konstiuensi hemi impoten blong mas mekem wan ripot blong ol mane blong pipol wei hemi bin spendem. MP Maoh hemi se, blong kam olsem wan Memba blong Palamen o wan nasonal lida, hemi bigfala wok, sakrifaes, komitmen, honesti mo fulap kwualitis we yu mas gat long save kam tekemap rol ia.

Hemi se, mane blong puplik hemi wan bigfala wok blong lukaotem gud, tastawe hemi impoten blong everi MPs oli mas fil responsibol blong ripotem hamas mane we oli spendem. Olsem wan nasonal lida blong kantri mo provins blong Sanma mi stap mekem pat blong mi blong mekem wan ripot olsem blong soemaot wan niufala kaen wei blong mekem lidasip insaed long provins blong Sanma mo kantri blong Vanuatu.

MP Maoh hemi gohed blong talem se hemia hemi 2014 ripot blong alokesen spending we mi olsem MP blong Sanma provins mi bin yusum. Sipos yu lukluk gud long ripot, mi traem everi bes blong mi blong mekem sua se ful 12 eria kaonsels i mas kasem smol sapot tru long alokesen spending. Fulap komiunitis oli kasem smol sapot, mo fulap oli no kasem smol sapot yet, from ples hemi bigwan mo mi bin karem plante rikwes. Be bigfala tingting hemi stap blong kontinu blong mekem sua se mi mas mekem everiwan bifo term blong mi hemi finis.

MP Maoh hemi talem se hemia nambatu alokesen ripot we mi mekem. Long 2013 totel alokesen spending blong mi mo staf blong mi we oli wok long Ministri blong Lands hemi kasem 3,660,025 vatu. Long las yia 2014 hemi lukem wan bigfala inkris long spending we totel mane hemi kasem 4,546,715 vatu. I soemaot wan amaon blong 886,690 vatu inkris bitwin yia 2013 mo yia 2014. 

MP Maoh hemi gohed blong talem se spending olsem i soemaot wan sakrifaes mo komitmen spirit blong mi mo staf blong mi long Ministri blong Lands we mifala evriwan i mekem bifala wok ia, mo mi mas talem bigfala tankyu I go long God mo olgeta staf blong mi. Tok tankyu i go tu long Vimele Vilej blong save hostem impoten iven ia.  Afta long hemia, bae i gat distribyusen blong alokesen posta i go long evri komiuniti long Santo. Semak seremoni olsem hemi hapen tu long Wunpuko Vilej long not wes Santo, folem wetem distribiusen blong ol postas i go aot long not wes eria.