Ol MP blong GJP oli putumaot 2014 alokesen spending ripot

Ol 4 MP we oli bin stanap long tikit blong GJP long 2012 jeneral eleksen oli putumaot ol alokesen spending ripot blong olgeta blong yia 2014 blong kontiniu blong fulfilim ol promis we oli mekem long ol vota long taem blong 2012 eleksen kampen.

Long eleksen kampen, GJP i bin promis se bae evri MP we oli elektem olgeta bae oli mekem ol samting ia:

  1. Didaktem ful MP alokesen aot long salari blong MP mo yusum evriwan blong mitim ol nid blong komuniti mo mekem ripot blong hem afta olsem wan posta we bae oli save hangem long evri ples long konstituensi. Amaon we GJP i stap didaktem long salari blong ol MP blong hem hemi 2 million vatu, we oli ademap long 1 million vatu alokesen we Palamen i givim;
  2. Stanemap wan skolaship skim long konstituensi blong olgeta wetem 750,000 vatu evri yia aot long alokesen blong olgeta. Ol pikinini bae oli save winim skolaship folem nomo marks blong olgeta (olgeta we oli karem hae marks nomo bae oli karem skolaship) mo faenansol nid blong famli blong pikinini.

Naoia evri 4 MP we oli bin elektem olgeta long tikit blong GJP long 2012 general eleksen oli putumaot posta ripot blong alokesen spending blong olgeta blong 2014, we evriwan i bitim 3 million vatu mo 3 i bitim 4 million vatu, mo we i soem se evriwan i spendem 750,000 vatu long ol skolaship.

Ol MP blong GJP i gat Hon. Alfred Maoh long Santo Rural, Hon. Daniel Nalet long Malekula, Hon. Gillion William long Efate Rural, Hon. Ralph Regenvanu long Port Vila, mo Hon. David Tosul long Pentikos we hemi jas joenem pati long 2013 afta long jeneral eleksen.

Ol link blong wan wan posta blong ol MP hemia:

  1. POSTA BLONG MP RALPH
  2. POSTA BLONG MP GILLION
  3. POSTA BLONG MP ALFRED
  4. POSTA BLONG MP DANIEL