Graon Mo Jastis Pati I Karem Wan Moa Kaonsela Insaed Long SANMA Provinsel Kaonsel

Sanma Provincial Council i bin form long Mande 4 Januari wetem 5 Kaonsela blong GJP, mekem se niufala Presiden blong Sanma i kamaot long GJP, Kaonsela John Olo Aru.
 
2 manis mo 2 wik afta long fomesen blong Kaonsel, long Fraede 19 Febuari 2016, Kansela blong Vanuatu Presidential Pati (VPP) long Saot Santo Eria 1, Hon. Vutnaia Efu, i mekem wan kastom seremoni blong kam joenem GJP.
Kaonsela Vutnaia i mekem muv ia wetem Jeamen blong hem Jif Michael blong Benmol mo ova 500 sapota blong tufala we i muvaot long VPP mo kam joinem Graon mo Jastis Pati.
 
Hon. Alfred Maoh, Minista blong Internal Afeas, GJP Sanma Eksekutiv Jeaman Jean Vincent Rocroc mo GJP Kaonsela blong Malo, Hon. Thomas Vora oli bin risivim kastom seremoni ia long bihaf blong pati. Wetem muv ia, ol Kansela blong GJP long Sanma Provinsel Kaonsel naoia i nomo 5 be i kasem 6.

Kaonsela Vutnaia hemi wan festaem kaonsela long Sanma Provins mo semtaem hemi stap olsem Jeaman blong Disasta Komiti insaed long Sanma Provinsel Gavman. 
 
Kaonsela hemi kamaot long vilij blong Tanavusvus mo hemi wan rispekted lida insaed long komuniti blong hem long Saot Santo Eria 1, espesli long level blong jioj mo komuniti.
 
Kansela Vutnaia hemi kandidet we i skorem haest namba blong vot long Sanma Provinsel eleksen long Disemba 2015.