Foma MP George Wells Mo 2 Kaonsela Blong Hem I Joenem GJP

Long Sande 21 Febuari, foma MP blong Luganville, George Andre Wells, i mekem kastom seremoni blong Joinem Graon mo Jastis Patis (GJP).
 
Foma MP George Andre Wells i kam joenem GJP wetem ful Eksekutiv blong hem mo wetem 2 kaonsela blong Luganville Munisipol Kaonsel, Kaonsela Renata Netaf long Sentrol Ward mo Kaonsela Felma Sam long East Ward.
Foma MP George Andre Wells i bin stap olsem MP blong Luganville blong 19 yia kasem long yia ia taem hemi no bin manej blong sikiurim bak seat blong hem long snap eleksen. Long las Luganville Munisipol eleksen long Julae 2015 hemi manej blong winim 3 kaonsela wetem sapot blong Unity Front for Change.
 
Kastom seremoni i bin tekem ples long eria blong foma MP long Sarakata mo plante pipol blong Luganville mo ol reprisentetiv blong ol defren politikol pati oli bin stap long taem ia blong witnesem seremoni ia.
 
Hon. Alfred Maoh, Minista blong Intenol Afeas mo GJP MP blong Santo mo GJP Kaonsela long Luganville Munisipol Kaonsel Hon. Wala Rongo tufala i bin risivim kastom ia long bihaf blong pati. Wetem seremoni ia i minim se naoia Graon mo jastis Pati i gat 3 kaonsela evriwan insaed long Luganville Munisipol Gavman.