Graon mo Jastis Pati

 Folem Mifala lo Faceboopk

MP David Tosul i joenem GJP

Long wan smol seremoni long Ministri blong Agrikalja long Fraede 30 Ogis, MP blong Pentikos mo semtaem Minista blong Agrikalja, Hon. David Tosul, i bin joenem Graon mo Jastis Pati (GJP).  

Long seremoni ia, MP Tosul i bin presentem 2 mat wetem wan faol mo taro i kam long Presiden blong GJP, MP Ralph Regenvanu, olsem wan saen blong muv blong hem blong kam joenem GJP, mo MP Regenvanu i bin givim 2 mat wetem wan yam mo wan faol i go bak long MP Tosul olsem saen se hem mo eksekutiv i akseptem MP i kam insaed long pati.  

Olgeta we oli witnisim seremoni ia i gat ol narafala 3 MP blong GJP, sam blong ol Kaonsela blong pati, ol memba blong eksekutiv blong pati, ol memba blong eksekutiv blong MP Tosul mo ol sapota blong GJP mo MP Tosul.

Long toktok blong hem, MP Tosul i talem se hemi bin toktok wetem ol sapota blong hem raon long aelan blong Pentikos mo long namba 30 Julae long yia ia ol Sab-Komiti blong hem oli bin mit wetem hem long Saot Pentikos mo apruvum tingting blong hem i joenem GJP.  Hemi talem tankyu long eksekutiv blong pati blong save akseptem hem i kam wan memba blong GJP.

Long toktok blong hem, MP Regenvanu, Presiden blong GJP, i bin talemaot se hemi glad tumas blong save gat wan gudfala nasonal lida olsem MP Tosul i kam joenem pati.  Hemi talem se GJP hemi wan pati we hemi gat kraeteria blong jusum ol kandidet blong hem blong mek sua se hemi gat ol gudfala lida oltaem, mo MP Tosul hemi wan MP we hemi fitim gud kraeteria blong pati.  MP Regenvanu i talem tu se bambae GJP i benefit bigwan long 12 yia ekspiriens blong MP Tosul long palemen.

Naoia we MP Tosul i joenem GJP, GJP i gat 5 MP long nasonal palamen mo insaed long gavman we Hon. Moana Carcasses Kalosil i lidim.  Wan kaonsela blong MP Tosul long Penama Provinsel gavman hemi kam insaed long GJP tu, mo joenem Vaes-Presiden blong Provins mo GJP Kaonsela blong Maewo, Hon. Jackson Adin, blong givim GJP 2 kaonsela long Penama Provins naoia.

 

  • Created on .

Copyright ©2019 - All Rights reserved Graon Mo Jastis Pati - Vanuatu