SMOL HISTRI LONG GJP
Graon mo Jastis Pati (GJP) i bin bon long 11 Novemba 2010.
Tingting blong stanemap niufala politikol pati ia i gerap nomo folem rikwes blong fulap sapota blong Indipenden MP blong Port Vila, Hon. Ralph Regenvanu, blong i mas gat wan pati.
Ol rikwes ia i kam long ol vota blong MP Ralph long Vila mo tu long ol defren aelan blong kantri, stat long Torres kasem Aneityum.
Tingting blong stanemap Pati ia i gerap tu folem ol lukluk olsem:
MP Ralph i kam insaed long Palemen blong mekem fulap jenis we hemi bin talemaot long polisi platfom we hemi bin kampein from long 2008, taem we hemi winim jea blong hem olsem wan MP.
Nomata we MP Ralph i winim hae-est namba blong vot long konstituensi blong Port Vila, mo tu long kantri, from we hemi wan Indipenden, insaed long Palemen bigfala namba blong ol vota blong hem i no minim wan samting, from hemi gat 1 voes nomo aot long 52 voes blong evri MP.
Insaed long Palemen, gudfala tingting o gudfala polisi hem i no mata; wan samting nomo hem i impoten, hem i namba blong ol MP we i stap tugeta wan ples. I minim se jenis ia we yumi wantem bae i no save hapen kwiktaem sipos MP Ralph hemi stap yet olsem wan Indipenden MP.
Wan stampa tingting blong stanemap Pati ia hem i blong putum moa man insaed long Palemen wetem MP Ralph – mo tu long ol Provinsel mo Munisipol Kaonsel - blong sapotem visen mo polisi platfom blong yumi we bigfala namba blong pipol long Port Vila i bin vot from long 2008 mo bakagen long 2012.
Jenis bae i no save hapen kwiktaem tu sipos we MP Ralph i bin go joenem wan narafala pati we i gat ol eksekutiv mo ol MP blong hem finis, mo we i gat wan histri blong hem mo ol polisi blong hem i stap finis we MP bae i mas wok had blong jenisim.
Yumi no wantem tu se “bad rekod” blong ol narafala Pati ia bae i save spoelem nem blong yumi sipos yumi joenem olgeta.
Lidaship we MP Ralph i bin stap demonstretem i stap pulum fulap sapot. Bigfala toktok blong kampein blong GJP long tufala las jenerol eleksen long 2008 mo 2012, we i kamaot long T-shet mo posta, hem i talem olsem: “Blong soemaot wan niufala kaen fasen blong save mekem gudfala lidaship olsem wan MP mo wan nasonal lida”.
Yumi stap ting se naoia fulap man i stap luksave se GJP i stap fulfilim toktok ia we MP Ralph afta pati tu i bin talem.
Fulap man tu i stap harem ol toktok blong ol MP blong GJP long Palemen mo luk ol inisetiv we GJP i stap mekem insaed long Gavman mo tu long ol konstituensi blong olgeta, mo oli intres bigwan long lidaship blong MP Ralph olsem Presiden blong Pati mo long Pati tu.
Hemia tu hem i wan stampa risen from wanem yumi stanemap niufala Pati ia, blong traem putum ol gud kandidet long evri konstituensi blong pulum bigfala sapot we i stap naoia i go insaed long Palemen blong mekem ol gudfala jenis.
Long 2012 Jenerol Eleksen, Pati i bin winim 4 MP evriwan:
MP Ralph Regenvanu long konstituensi blong Port Vila
MP Gillion Williams long konstituensi blong Efate Rural
MP Daniel Nalet long konstituensi blong Malekula
MP Alfred Maoh long konstituensi blong Santo Rural.
Afta long 2013 Provinsel Eleksen, GJP i bin putum ol kandidet long PENAMA, MALAMPA mo SHEFA (Pati i no bin putum eni kandidet long TAFEA), mo yumi bin winim 7 Kaonsela evriwan long 3 Provins:
Long PENAMA Provins, yumi winim Jackson Adin olsem wan kaonsela blong Maewo aelan. Jackson hemi bin holem posisen blong Vaes-Presiden blong Penama Provins blong 2 yia stat long 2013 kasem 2015.
Long MALAMPA Provins, yumi winim 3 jea : Tasso Fred mo Loren Urinmal long Malakula mo Jim Tonny long Ambrym. Yumi karem hae-est namba blong jea long provins wetem UMP mo VP (we tufala tugeta i winim 3 kaonsela tu). Tasso Fred hemi kam Presiden blong Malampa Provins.
Long SHEFA Provins tu, yumi winim 3 jea : Max Johnny mo Willie Ben Kalmasei long Efate mo Joel Abel long Lelepa-Mosso. Yumi karem hae-est namba blong jea long provins wetem RMC (we i winim 3 tu). Max Johnny hemi kam Vaes-Presiden blong Shefa Provins.
Long yia 2013, MP David Tosul blong Pentikos konstituensi i mekem kastom blong kam insaed blong joenem pati wetem kaonsela blong hem long Penama Provins, Yan Melsul.
Mo long 2013 mo 2014, 3 kaonsela blong Malampa Provins bakagen i mekem kastom blong kam joenem pati (Kaonsela Cesar Raphael mo Kaonsela Ringo Maltungtung long Malakula mo Kaonsela Elgem Timothy long Paama) mo 1 kaonsela long Sanma Provins i mekem kastom blong kam joenem pati (Kaonsela Thomas Wora long Malo).
Long yia 2014, GJP i bin winim 2 kaonsela long Port Vila Munisipol Eleksen, Kaonsela Rose Peter mo Kaonsela Elison Tabisal (be afta GJP i sakemaot Kaonsela Elison bakagen long en blong 2014).
Long yia 2015, long re-eleksen blong ol presiden blong ol Provins, GJP Kaonsela Max Johnny hemi kam Presiden blong Shefa Provins mo GJP Kaonsela Tasso Fred hemi elected nambatu taem olsem Presiden blong Malampa Provins. So GJP i holem Presiden blong tufala Provins ia naoia.
Long yia 2015 tu, GJP i kontestem Luganville Munisipol Eleksen mo winim 1 kaonsela, Wala Rongo.
Long Disemba 2015, GJP i kontestem Sanma Provinsel Eleksen wetem 8 kandidet, mo i winim 5 kaonsela, 2 long Malo mo 3 long big aelan blong Santo:
Thomas Vora,
Nethan Jacob,
John Olo Aru,
Abel Tangis
Johnsei Boe.
John Olo Aru hemi elected long 4 Januari 2016 olsem Presiden blong Sanma Provins, minim se GJP i holem Presiden blong 3 provins long 2016 – Malampa, Shefa mo Sanma.
Long Januari 2016 “snap” Jenerol Eleksen, Pati i bin winim 7 MP evriwan:
MP Andrew Napuat long konstituensi blong Tanna
MP Ralph Regenvanu long konstituensi blong Port Vila
MP Gillion Williams long konstituensi blong Efate Rural
MP Tasso William Fred long konstituensi blong Paama
MP Albert Williams long konstituensi blong Ambrym
MP John Sala long konstituensi blong Malekula
MP Alfred Maoh long konstituensi blong Santo Rural
Semtaem, long snap Jenerol Eleksen kandidet blong GJP i bin “runner up” long las jea long 3 konstituensi bakagen: Malo, Malekula mo Epi.
Risal blong 2016 “snap” Jenerol Eleksen i mekem se GJP hemi pati wetem moa MP long Palamen (VP mo UMP tufala i gat 6 MP), mo tu GJP hemi karem 3rd highest namba blong vot long kantri (VP hemi karem moa vot, UMP nambatu).
Long Febuari 2016, 2 kaonsela blong Luganville Munisipol Kaonsel i mekem kastom blong kam joenem pati (Kaonsela Renata Netaf mo Kaonsela Elva Sam) mekem se GJP naoia i gat 3 kaonsela long Luganville Munisipol Kaonsel.
Long Febuari 2016 tu, 1 kaonsela blong Sanma Provinsel Kaonsel i mekem kastom blong kam joenem pati (Kaonsela Vutnaia Efu) mekem se GJP i gat 6 kaonsela long Sanma Provinsel Kaonsel.
Wetem ol risalt ia long Jenerol Eleksen blong 2016 mo ol Provinsel Eleksen blong 2013 mo 2015, hemi soem se GJP naoia hemi fastest growing politikol pati long Vanuatu.